Entrevistamos a Ermitas, que explícanos un interesante proxecto para a comercialización de Froita Ecolóxica de Cedeira.

Trátase dunha finca de 14 ferrados adicada á froita do país, con árbores que foran plantadas -algunhas delas- hai máis de 40 anos, en principio coa idea de servir de autoconsumo para a propia familia, pero que hoxe xeneran un excedente que os seus propietarios colocan no mercado coas garantías que otorga o selo ecolóxico.

Cal é a vosa experiencia experiencia?

Levamos querendo certificarnos 3 anos. Contamos con obter a certificación agora no mes de maio. Agora mesmo aínda estamos en conversión a ecolóxico.

A horta xa ten moitos máis anos, e nunca foi tratada con químicos porque xa era a filosofía dos que plantaron. Hai árbores aquí que teñen 40 anos. Algúns xa morreron e logo tamén replantamos, pero nunca se utilizou químico ningún nin en tratamentos nin en abonos.

Xa viñeron por aquí os técnicos do CRAEGA. Este vai ser o terceiro ano. Para a froita necesitan tres anos, e aínda que non houbera tratamentos previso, desde o momento en que se empeza a documentar fai falta que pase un periodo de tres anos. Entonces veñen outra vez e analizan o terreo, e comproban que non se fixera nada do que non está permitido.

A partir do segundo ano podes empezar a vender como en conversión, e a partir do terceiro ano, se non hai incidencias, pódese empezar a vender como cultivo ecolóxico. Fáltanos menos  dun mes!!

Por que pensades en producir en ecolóxico??

Sobre todo por respetar o medio ambiente, para demostrar que se pode cultivar en ecolóxico. Pero básicamente por respetar.

O producto pode ser máis feo de aspecto. Para que saia todo igual hai que utilizar hormonas, produtos para que a mesma planta descarte as diferencias. Pero que as maźas, ou os limóns ou calquera outra froita, sexan máis grandes ou máis pequenas non quere decir que estén peor de sabor nin que sexan menos saudables. Aforrar todo ese material químico contribúe a non perxudicar tanto o planeta.

Que tipos de froita tedes?

Temos froita variada. O que máis temos é kiwi, noz, limón e outros cítricos. Estas son as froitas que hai durante máis meses no ano.

Logo hai outras froitas que son máis de temporada, como pode ser a pera, a mazá, a cereixa… E logo hai pequenas producións de figos, pomelo, laranxa amarga… Temos castaño, pero da máis problema de cara ás plagas. Por exemplo a castaña aquí é moi fácil que teña verme, por eso preferimos non comercializala.

¿Canta superficie é a que tedes?

Son 7.000m2. Todo con froiteiras de distinto tipo.

¿Que problemas atopáchedes para producir en ecolóxico? , ¿con que problemas ten que lidiar unha persoa que queira producir deste xeito?

Hai que facer unha documentación para o CRAEGA, pero realmente a min non me pareceu tanta barreira.

Si que me parecen barreira os prazos que pon o CRAEGA, que por outro lado tamén é comprensible, pero facendo as analíticas non entendo por que hai que esperar tanto tempo, pero supoño que eso estará estudiado, digo eu. Foi o peor para min, o que supón a primeira barreira porque non é unha actividade que se poida empezar a facer de repente, senon que hai que planificar no tempo e hai que saber de que vas vivir antes, ata que se chega a poder producir en ecolóxico.

Despois, aquí trátase da venta dun excedente, pero se se quere vivir da produción ecolóxica, a loita contra as plagas é traballosa. Nas froiteiras depende cales: aquí o kiwi case non ten ningún problema, os círicos tampouco porque son froitas que veñen sanísimas. Poden ter diferencias de tamaños ou no sabor, que a verdade é que nós, na nosa horta, temos bastante sorte porque está orientada nunha ladeira ao sur, e a froita está moi boa… e madura ao sol!!, non madura en cámaras porque é recollida no momento no que se vai consumir.

O mellor lugar de conservación que hai, pola miña experiencia, é a árbore. É o lugar donde mellor se conserva a froita.

O que fai falta é que a xente se conciencie de consumir produtos de tempada, porque está claro que calquera produto que veña fora de tempada tivo que pasar por algún método de conservación…, non sei cal…

A veces encontramos en grandes superficies froita etiquetada como ecolóxica fora de tempada, e a min resúltame sospeitoso. De feito, non é como a froita recollida da árbore, está claro. Pode estar certificada, pero dentro do ecolóxico tamén haberá procedementos de conservación que fai que non chegue o produto ao consumidor igual que o produto de cercanía. Por eso, eu creo que ese comercio de cercanía, de tenda pequena na que se está recibindo produto fresco ten un valor engadido con respecto a grandes superficies ás que chegan os produtos de lonxe, e xa hai unha carga de contaminación e un gasto extra ligado ao transporte que non hai nunha tenda de cercanía.

¿Tedes idea de vivir completamente de esto ou o tedes máis como un excedente?

A horta estaba xa plantada. É unha horta grande que estaba pensada para autoconsumo, pero as familias agora son pequenas e hai excedente. Entonces a idea era o de sacar un extra para poder coidar da horta. O que non se pode é estar gastando sempre nela sin recibir. Tratábase de que a horta se poidera manter a si mesma, e que máis xente poidera aproveitar o bo desta froita.

¿Que canles de comercialización empregades?

De momento, pensamos so en comercio pequeno, en acudir a pequenas tendas que estén dispostas a vender esta froita, ou tamén á venta directa para quen esté disposto a acudir ata aquí, ata Cedeira.

¿En que aspecto da vosa actividade vedes máis marxe de mellora?

No coidado da horta, porque foi unha horta que estivo moito tempo descoidada. Gustaríanos contar con alguén que soubera podar e coidar un pouco mellor das árbores, porque son seres vivos que se non se coidan un pouco acaban morrendo.

Deberíamos mellorar os nosos coñecementos sobre esto, porque a horta foi sempre como un paraíso. Un ía andando e comendo da árbore o que lle apetecía, pero hai un momento no que se escapa, cando as árbores medran moitísimo…

O tema das enfermedades preocúpame tamén. Hai dous anos tivemos que cortar as ameixeiras porque enfermaron todas do mal do chumbo. Está moi bonito tela como a tiñamos, salvaxe, pero por outro lado tamén se ve que hai que darlles coidados.

Outra preocupación que temos é a vespa velutina, que á froita venlle bastante. Cortamos algunhas árbores porque eran pasto da velutina, figueiras grandes. En Cedeira, aquí na costa, hai moita velutina e afecta bastante. Gústalles a froita doce e a finais do verán é terrible. Ao que aínda non lle entran é aos cítricos, nin aos kiwis porque xa lles fai moito frío.

¿Que perspectivas tedes?

Pois agora empezar a vender co selo. De momento estaban baseadas as ventas na relación de confianza coa xente, pero cando se ten un certificado pódese chegar a máis público e aquí, de momento, aínda hai excedente.

Para nós é un orgullo, e unha marca de calidade.

Ademáis da froita tamén alugamos apartamentos, e é un valor engadido para quen veña de visita aos apartamentos poder andar pola horta e recoller a propia froita. Hai moita xente das cidades que para eles é unha experiencia totalmente nova. Para os que vivimos nos povos calquera ten un pedazo de terra, e é algo moi natural, pero hai moita xente para a que é algo espectacular dar un paseo pola horta e ¡¡sempre hai algo!! Que é tamén o bonito, porque en todas as épocas do ano hai algo de froita.

O mellor do ano é durante o verán e o outono, pero durante todo o ano hai algo: ata febreiro hai kiwi, e cítricos durante todo o inverno

Horta · Graneis · Envasados
Cosmética · Droguería